Tres días de moito, moitísimo traballo, pero tamén de moita, moitísima diversión os que pasamos esta Semana Santa no Museo do Mar.
Fixemos un longuísimo percorrido partindo da aparición do lume na vida do home, cos moi diversos usos que lle deu, pero fixándonos sobor de todo na aplicación que tivo para cociñar os alimentos, logo detivémonos nas lareiras, co seu lar no que facer o lume, os escanos onde sentarse a seu carón e a cambota onde se afumaba o peixe ou os chourizos.
Continuamos polas cociñas de ferro, que deron paso ás de butano e acabamos nas vitros e na indución.
Tamén tomamos conciencia do importante que é colaborar todos nas tarefas do fogar, comer axeitadamente e votarlle imaxinación e creatividade á hora de cociñar.
Os resultados, unhas maquetas dunhas cociñas con lareira e cociña de ferro, e uns pratos de tartaruga de chocolate, canapé de barco e de estrela de mar ou sándwich de peixe.
Xa vos iremos contando que é o próximo.